臨近年尾，好多婚宴要去，真係做人情都做到手軟。譚師奶啱啱飲完大學同學嗰餐，十幾年嚟見證住佢嘅初戀，由拍拖，到宜家嫁作人妻，一路走來，真係好令人感動。 戥新婚夫婦開心之餘，席間，梗係同那些年嘅八婆聚舊啦。話題由當年嘅識男仔扮靚減肥，到宜家傾煮飯家居䕶理湊仔經，感嘆歲月如梭呀。
講到湊仔，陳師奶開始大吐苦水... 話說佢嘅前一後九已經放完，係時候要面對現實番工。喺番工前，當然要搵個姐姐照顧陳仔啦。事情已經唔係話信唔信得過姐姐，而係搵咗成個月，先至有人肯上工。陳師奶話，初頭見面都好哋哋，姐姐仲要喺印尼讀過大學，感覺佢會明白事理。點之，做咗半個月，就現形喇。成日掛住上網玩電話煲電話粥；最離譜係，明明聽到陳仔喊，都視若無睹，繼續講電話，激到陳師奶彈起。最慘係，未做夠三個月，炒佢魷魚要賠機票錢丶要補水送佢番歸，佢之後又可以輪迴去下一個家庭。陳師奶真係進退兩難...
據我所知，坊間有D家務助理Apps可以幫手。利用手機軟件，僱主同僱員可以隨時隨地直接進行配對，免除中介，慳番好多功夫時間。咁好用，我當然分享咗俾陳師奶啦。
之後，陳師奶用艶羨嘅目光望住何師奶，話羨慕何師奶有奶奶幫手，好幸福。何師奶當堂打咗個突，話有苦真係自己知。奶奶成日幫倒忙，奶樽未消毒乾淨就用丶又成日縱個孫，俾佢食零食云云…
譚師奶諗起，自己細個邊有咁幸福，有專人服侍之餘，仲有錢上補習班丶學樂器。家母要番工，童年都係外婆拉拔湊大。外婆讀書唔多，盡咗一日三餐丶管接管送嘅任務，其它時間，都係譚師奶自己搞掂。放學番屋企就做功課；做完功課，極其量去隔離屋度玩。外婆嗰個年代仲刻苦，月子都未坐夠，就要幫人洗衫賺錢，所謂手停就口停。以前物質無咁充裕，日子依舊咁過；鄰居之間，互相守望相助，反而仲有一種淡淡嘅人情味。要唱番首…
"懷緬過去常陶醉
一半樂事 一半令人流淚
夢如人生 快樂永記取
悲苦深刻藏骨髓"
譚師奶簡介: 全職家庭主婦，夢想環遊世界。利用做家務空餘時間，網上神遊世界，馳騁文學歷史。
