人體三大主要營養係碳水化合物、蛋白質同脂肪，減得肥就當然要減脂，咁就要著重返碳水化合物同蛋白質嘅攝取量，而啱啱做完運動流失唔少水份同能量，就正正需要補充營養、水份同增長肌肉嘅好時機，所以最好就係運動後大約兩個鐘內食一份營養均衡嘅正餐。
全麥麵包／糙米飯／五穀飯／燕麥
呢幾樣都含有豐富嘅碳水化合物，佢地可以為身體補充纖維同調整血糖，唔似白飯係經過加工，令大部分嘅營養同膳食纖維流失，亦會令血糖上升，所以會較容易引起肥胖或糖尿病等問題。
無糖豆漿／低脂奶／肉類高蛋白質
運動時我哋啲肌肉組織會受到破壞，而蛋白質就可以加快運動後嘅肌肉復元，仲可以補充肌肉生長，其中肉類係含有較高蛋白質，例如雞胸肉、菲力（Fillet）、鴨肉、羊肉等，呢幾種肉蛋白質同鐵質都較高，而且熱量低，較適合減緊肥嘅你食用。
而無糖豆漿就含有大豆蛋白，糖份、熱量同脂肪都較低，仲可以預防高血壓等心血管疾病；低脂奶除咗低脂同高蛋白質，最重要係佢含有豐富鈣質，可以有效預防骨質疏鬆，增加骨質密度，做完運動最需要，如果兩樣都飲就最好，咁豆漿就可以補充牛奶較少嘅鐵質，而牛奶就可以補充豆漿較少嘅鈣質，互補不足。
蔬菜／水果
無論係咪減緊肥，都要食多啲菜，因為菜裡面有豐富嘅膳食纖維、礦物質同維他命，營養價值較高，易有飽肚感，例如菠菜有較高鐵質、紅蘿蔔有豐富嘅維他命A可以預防夜盲症，芽菜就高維他命C，呢幾種蔬菜熱量都比較低，可以多食，仲可以通便減肚腩！！
喺水果方面，蘋果多鐵質；西瓜多維他命A同茄紅素，可以抗衰老，而家夏天食仲可以消暑解渴；木瓜多纖維素，仲可以幫助消化、分解多餘脂肪；金奇異果多維他命C，食兩個幾乎可以補充一日所需；藍莓抗氧化，可以明目、增強記憶力，仲有研究顯示可以防止泌尿道感染。所以水果真係食多多都唔怕，不過最好適可而止，好似荔枝雖然多維他命C，但容易上火；西瓜食太多又易腹瀉；即使係而家好多人都追棒嘅牛油果，雖然可以保持心臟和血管健康，仲可以美白養顏，但熱量係十分之高。
減肥修身係條漫漫長路，不過都要減得健康，營養均衡，唔好以為唔食一餐幾餐就可以減到，有時咁仲會越減越肥，甚至有機會患上厭食症，得不償失。
各位減緊肥嘅朋友，共勉之。
